Deu 23 | Ndebele | STEP | Olimele emasendeni, loba oqunywe amaphambili, angangeni ebandleni leN kosi .

Deuteronomy 23

Abangavunyelwayo ukungena ebandleni leNkosi

1 Olimele emasendeni, loba oqunywe amaphambili, angangeni ebandleni leNkosi.

2 Ozelwe ngobufebe angangeni ebandleni leNkosi; ngitsho isizukulwana sakhe setshumi kasiyikungena ebandleni leNkosi ^a.

3 UmAmoni lomMowabi kangangeni ebandleni leNkosi; ngitsho isizukulwana sabo setshumi kasiyikungena ebandleni leNkosi, kuze kube laphakade ^b; 4 ngenxa yokuthi kabalihlangabezanga endleleni ngesinkwa langamanzi ekuphumeni kwenu eGibhithe ^c; futhi ngoba baqhatsha ukumelana lawe uBalami indodana kaBeyori owePethori oweMesopotamiya ukuze akuqalekise ^d. 5 Kodwa iNkosi uNkulunkulu wakho kayifunanga ukuzwa uBalami; kodwa iNkosi uNkulunkulu wakho yaphendula isiqalekiso saba yisibusiso kuwe, ngoba iNkosi uNkulunkulu wakho yakuthanda ^e. 6 Kawuyikudinga ukuthula kwabo lokuhle kwabo zonke izinsuku zakho, kuze kube laphakade ^f.

7 Unganengwa ngumEdoma, ngoba ungumfowenu; unganengwa ngumGibhithe ^g, ngoba wawungowemzini elizweni lakhe ^h. 8 Abantwana abazalwa yibo, besizukulwana sesithathu sabo, bangangena ebandleni leNkosi.

Ukuhlambuluka kwamathente

9 Lapho inkamba iphuma ukuyamelana lezitha zakho, uzazigcina kuyo yonke into embi.

10 Uba ekhona phakathi kwenu umuntu ongahlambulukanga ngenxa yokungcola okwehla ebusuku, uzaphumela ngaphandle kwenkamba, angangeni phakathi kwenkamba ⁱ. 11 Kodwa kuzakuthi sekuzakuhlwa uzageza ngamanzi, lalapho ilanga selitshonile angene aye phakathi kwenkamba ^j.

12 Njalo uzakuba lendawo ngaphandle kwenkamba lapho ozaphumela khona ukuya ngaphandle ^k, 13 ube lesikhonkwane ezikhalini zakho; njalo kuzakuthi usuye ^{▼▼ usuye: Heb usuhlezi.} ngaphandle, ugebhe ngaso, uphenduke ugqibele okuphume kuwe. 14 Ngoba iNkosi uNkulunkulu wakho iyahamba phakathi kwenkamba yakho, ukukukhulula ^m, lokunikela izitha zakho phambi kwakho. Ngakho inkamba yakho izakuba ngcwele, ukuze ingaboni lutho oluyangisayo phakathi kwakho, ikufulathele ⁿ.

Imilayo emayelana lezigqili, lamawule, lomvuzo

15 Unganikeli enkosini yaso isigqili esibalekele kuwe sisuka enkosini yaso ^o; 16 sizahlala lawe phakathi kwakho, endaweni esizayikhetha, kwelinye lamasango akho, lapho okusilungele khona; ungasicindezeli ^p.

17 Kakungabi khona iwule elethempeli phakathi kwamadodakazi akoIsrayeli ^q, njalo kakungabi khona inkotshana phakathi kwamadodana akoIsrayeli ^r. 18 Ungalethi iholo lewule lemali yenja endlini yeNkosi uNkulunkulu wakho ngokwaloba yisiphi isithembiso; ngoba lokho kokubili kuyisinengiso eNkosini uNkulunkulu wakho.

19 Ungeboleki umfowenu ngenzalo, inzalo yemali, inzalo yokudla, inzalo yaloba yiyiphi into ebolekwa ngenzalo ^s. 20 Ungeboleka owezizweni ngenzalo, kodwa ungeboleki umfowenu ngenzalo ^t, ukuze iNkosi uNkulunkulu wakho ikubusise kukho konke ^u ofaka isandla sakho kukho elizweni oya kulo ukudla ilifa lalo ^v.

21 Nxa uthembisa isithembiso eNkosini uNkulunkulu wakho, ungaphuzi ukusikhokha; ngoba iNkosi uNkulunkulu wakho izasibiza lokusibiza kuwe; njalo kuzakuba yisono kuwe ^w. 22 Kodwa uba uyekela ukuthembisa, kakuyikuba yisono kuwe. 23 Lokho okuphuma endebeni zakho uzakugcina ukwenze; njengokuthembisa kwakho eNkosini uNkulunkulu wakho, umnikelo wesihle owukhulume ngomlomo wakho.

24 Nxa ungena esivinini somakhelwane wakho, ungadla izithelo zevini njengokuthanda kwakho usuthe; kodwa ungafaki lutho esitsheni sakho. 25 Nxa ungena emabeleni amileyo kamakhelwane wakho ^x, ungakha izikhwebu ngesandla sakho; kodwa ungangenisi isikela emabeleni amileyo ^y kamakhelwane wakho ^z.